ກຸ່ມຮູຕີຮຸກຄືບ ຂົ່ມຂູ່ການສົ່ງອອກນ້ຳມັນຂອງຊາອຸດີອາຣາເບຍ

ພາບຖ່າຍດາວທຽມເຫັນຄວັນໄຟຢູ່ໃກ້ທໍ່ສົ່ງນ້ຳມັນ East-West ຂອງຊາອຸດີອາຣາເບຍ ເຊິ່ງປະເທດນີ້ກຳລັງໃຊ້ປ່ຽນເສັ້ນທາງການສົ່ງອອກນ້ຳມັນ ຫຼັງຈາກການຂົນສົ່ງຜ່ານເສັ້ນທາງນ້ຳສຳຄັນຖືກໂຈມຕີໂດຍອີຣານ ແລະກຸ່ມກະບົດຮູຕີຂອງເຢເມນ.

Reuters ໄດ້ກວດສອບຢືນຢັນພາບດັ່ງກ່າວແລ້ວ ແຕ່ຊາອຸດີອາຣາເບຍຍັງບໍ່ໄດ້ຢືນຢັນ ໃນຂະນະທີ່ປະເທດກຳລັງເຜີຍໜ້າຮັບການໂຈມຕີຊ້ຳໆຈາກກຸ່ມທີ່ອີຣານໃຫ້ການໜູນຫຼັງ.

ຫາກການລຳລຽງນ້ຳມັນຜ່ານທໍ່ສົ່ງຕ້ອງຢຸດຊະງັກ ຣິຢາດຈະປະເຊີນກັບໄພຄຸກຄາມຄັ້ງໃຫຍ່ອີກຕໍ່ການສົ່ງອອກ. ອີຣານກຳລັງສະກັດກັ້ນເຮືອສ່ວນໃຫຍ່ບໍ່ໃຫ້ຜ່ານຊ່ອງແຄບຮໍມຸສ ຂະນະທີ່ກຸ່ມຮູຕີປະກາດຫ້າມນ້ຳມັນຊາອຸດີອາຣາເບຍຜ່ານທະເລແດງ ໂດຍເປົ້າໝາຍໂຈມຕີເຮືອຂອງຊາອຸດີອາຣາເບຍໃນເສັ້ນທາງນ້ຳ ແລະໂຈມຕີໂຄງລ່າງດ້ານພະລັງງານ.

ກຸ່ມຮູຕີຍັງສາມາດເຂົ້າເຖິງເກາະເປຣິມ ໃນຊ່ອງແຄບບັບ ແອລ-ມັນເດັບ ເຊິ່ງເປັນຄວາມຄືບໜ້າສຳຄັນທີ່ອາດຊ່ວຍໃຫ້ກຸ່ມນີ້ຮັດແໜ້ນການຄວບຄຸມເສັ້ນທາງເດີນເຮືອສຳຄັນແຫ່ງນີ້.

ກຳລັງຂອງລັດຖະບານເຢເມນທີ່ໄດ້ຮັບການຮັບຮອງຈາກນານາຊາດ ໄດ້ຖອນອອກຈາກເກາະດັ່ງກ່າວ ລວມເຖິງເມືອງຊາຍຝັ່ງດູບັບ ທີ່ຢູ່ກົງຂ້າມເກາະຈາກແຜ່ນດິນໃຫຍ່. ກ່ອນໜ້ານັ້ນບໍ່ຫຼາຍຊົ່ວໂມງ ກຸ່ມຮູຕີໄດ້ຍຶດເມືອງທ່າເຮືອໂມຄາ ເຮັດໃຫ້ການສັນຈອນທາງທະເລຖືກຂົ່ມຂູ່ໜັກຂຶ້ນ.

Reuters ລາຍງານໃນວັນພະຫັດວ່າ ປາກິສະຖານໄດ້ຖ່າຍທອດຄຳເຕືອນຈາກຊາອຸດີອາຣາເບຍໄປຍັງອີຣານ ໂດຍຣິຢາດຮຽກຮ້ອງໃຫ້ເຕເຮຣານຄວບຄຸມກຸ່ມດັ່ງກ່າວ ເພື່ອປ້ອງກັນບໍ່ໃຫ້ວິກິດການລຸກລາມໄປກວ່າເກົ່າ.

ຊາອຸດີອາຣາເບຍໃຫ້ການໜູນຫຼັງລັດຖະບານເຢເມນ ເຊິ່ງກຳລັງໂຈມຕີກຸ່ມຮູຕີ ແລະກຸ່ມຮູຕີກໍໄດ້ປະກາດຫ້າມນ້ຳມັນຈາກຊາອຸດີອາຣາເບຍທີ່ຂົນສົ່ງຜ່ານທະເລແດງ.

ໃນຕົ້ນອາທິດນີ້ ກຸ່ມຮູຕີໄດ້ເປີດການໂຈມຕີຄັ້ງໃຫຍ່ໃສ່ຊາອຸດີອາຣາເບຍ ໂດຍເປົ້າໝາຍໃສ່ 4 ເມືອງ ແລະສະຖານທີ່ຜະລິດນ້ຳມັນທາງຕອນໃຕ້ຂອງຣິຢາດ. ທາງການຊາອຸດີອາຣາເບຍຢືນຢັນການໂຈມຕີ ໂດຍລະບຸວ່າມີຜູ້ບາດເຈັບຫຼາຍກວ່າ 70 ຄົນ ລວມທັງແມ່ຍິງ ແລະເດັກນ້ອຍ. ຈາກນັ້ນ ກຳລັງຂອງຊາອຸດີອາຣາເບຍໄດ້ຕອບໂຕ້ດ້ວຍການໂຈມຕີທາງອາກາດໃນເຂດຕາເວັນອອກຂອງຊານາ ນະຄອນຫຼວງເຢເມນ ທີ່ຢູ່ພາຍໃຕ້ການຄວບຄຸມຂອງກຸ່ມຮູຕີ.

ລາຍງານຂອງ Axios ໃນວັນສຸກລະບຸວ່າ ເຈົ້າຊາຍໂມຮຳເມັດ ບິນ ຊັນມານ ມົງກຸດລາຊະກຸມານຊາອຸດີອາຣາເບຍ ໄດ້ໂທຫາປະທານາທິບໍດີ ໂດນັນ ທຣຳ 2 ຄັ້ງໃນວັນພະຫັດ ເພື່ອຮຽກຮ້ອງໃຫ້ລາວເປີດການໂຈມຕີກຸ່ມຮູຕີ ໃນຂະນະທີ່ກຸ່ມນີ້ກຳລັງຮຸກຄືບ.

ແນວໃດກໍຕາມ ທຣຳໄດ້ປະຕິເສດ. ເຈົ້າໜ້າທີ່ບອກກັບສື່ດັ່ງກ່າວວ່າ ສະຫະລັດບໍ່ມີແຜນໂຈມຕີກຸ່ມຮູຕີໂດຍກົງໃນເວລານີ້. ວໍຊິງຕັນກຳລັງເພີ່ມການສະໜັບສະໜູນໃຫ້ຊາອຸດີອາຣາເບຍ ແຕ່ຫຼີກລ່ຽງການເຂົ້າໄປພົວພັນໂດຍກົງ.

CNN ລາຍງານລະອຽດວ່າ ປັດຈຸບັນມີທີ່ປຶກສາທາງທະຫານສະຫະລັດຫຼາຍກວ່າ 100 ຄົນຢູ່ໃນຊາອຸດີອາຣາເບຍ ເພື່ອໃຫ້ການສະໜອງຂໍ້ມູນຂ່າວກອງ ແລະສະໜັບສະໜູນການກຳນົດເປົ້າໝາຍໃຫ້ແກ່ປະເທດ.